KALIBO, Aklan – – – Arestado ro waeo ka tawo matapos nga maaktuhang nagasugae bandang alas-4:00 it hapon sa Brgy. Magpag-ong, Batan.
Nakilaea ro mga suspek nga sanday Dexter Villaruel 40, ag Iluminado Conde, 66, parehong residente it Brgy. Bay-ang, Batan kamana man sanday Jenry Paclibare, 38; Alexander Canonigo ,57; Andy Pelonio, 34; Alberto Sabino, 69; Reygie Duro, 33; ag Ryan Bautista, 31, parehong residente it Brgy. Magpag-ong, Batan.
Nauna eon sigon kara nga nakabaton it tawag ro Batan PNP may kaangtanan sa illegal gambling nga nagakatabo sa nasambitang lugar.
May kaangtanan kara, insigidang nagpatigayon it operasyon ro mga pulis ag naaktuhang nagasugae it Majhong ag Pusoy ro nasambitang mga suspek.
Narekober sa mga raya ro cash money nga nagabalor sa P330.00 ag mga playing cards.
Ro nasambit mga persona hay gindaea sa taeatapan it pulisya ag nagapangatubang sa kasong pag-eabag sa Presidential Decree 1602 ukon kilaea bilang illegal gambling.
