Nakakulong eon sa custodial facility it New Washington Municipal Police Station ro sangka most wanted nga may kasong rape nga kan-o eamang hay naaresto it mga kapulisan sa anang baeay sa Barangay Jugas, New Washington.
Suno sa suspek nga si Daciem Andrade, residente it pabahay sa nasambit nga lugar nga nakibot imaw matapos nga arestuhon ko Hunyo 1 bangud sa anang pagkasayod hay nabasura eon ro nasambit nga kaso.
Gindakop it kapulisan ro suspek sa gahum it warrant of arrest nga gin-isyu it korte nga natungdan angot sa ginakaeakutan kara nga kasong rape sa Pagbilao, Quezon ko 2014.
Matapos nga matumod ro anang ginakahimtangan hay insigidang gindakop ro suspek it mga otoridad.
Samtang, ginsaysay ni Andrade nga ginpasibangdan eamang imaw nga gin-rape ro anang gumankon nga nagapang-edaron it 16 anyos ko rato nga tiempo.
Nagtanum sigon it kaeain it buot ro anang gumankon kana matapos nga ginbawaean nana nga magdaea it anang nobyo sa andang baeay.
Si Andrade hay nagatrabaho makaron bilang sangka kusinero ag tanod sa andang lugar.
Imaw hay nakapangasawa ag may sambilog nga unga makaron.
