KALIBO, Aklan — Matapos ro haeos an-um nga dag-on nga pagpanago sa kasuguan, naaresto eon ro sangka wanted sa kasong rape ag acts of lasciviousness sa ginpatigayon nga operasyon it mga otoridad sa Brgy. Navitas, Numancia.
Nakilaea ro suspek nga si Jessie Ramilla Jalocon alyas “Popot”, 32, ag residente it nasambit nga lugar.
Gin aresto si Jalocon pinaagi sa gahum it warrant of arrest nga ginpaguwa it korte ko April 11, 2013 matapos nga maispatan it kapulisan ro anang presensiya sa nasambit nga lugar.
Kapin sa P180,000 ro gintaeana nga piyansa it korte para sa anang temporaryong kahilwayan para sa kasong acts of lasciviousness samtang owa it piyansa ro ginapangatubang nga kasong rape.
Nasayuran nga natabo rong pagpanghimueos it suspek sa sangka 3-anyos nga ungang babaye ko 2011 sa Pasay City.
Sa makaron hay kulong sa lock up cell it Numancia PNP si Jalocon ag nakataeana nga iga turn-over sa korte nga natungdan.
