KALIBO, Aklan—Hugut nga ginpamalibaran ni Jail Inspector Eduardo Beñares, warden it Bureau of Jail Management and Penology ukon BJMP-Aklan ro mga alegasyon nga gina-eapog kontra kana.
Nagaduda si Jail Inspector Beñares nga posibleng bangud sa anang pag-instrikto sa mga patakaran umpisa nga nagdumaea imaw sa jail facility ko Agosto 16 rason nga nagdumot kana ro ibang mga personnel.
Pila suno kana sa mga personnel it BJMP hay ananag gin-relieve ag ginpa-explain bangud sa mga nataeupangdan nga malpractice ag irregularities.
Pila sigon sa anang gin relieve hay taga-aklan nga owa naila nga mapaeayo sa andang pamilya.
Samtang, nagpahayag man imaw it kahauman nga anuman nga oras hay magahalin sa anang pwesto engkaso nga may lapses sa anang trabaho.
Sa sangka interview, ginpahayag sa Bombo Radyo ni jail Senior Superintendent Gilbert Peremne it BJMP-6 nga nakabaton sanda it text message ko nobyembre 29 halin sa sangka anonymous number nga naga-alegar nga ginpahatud ni Beñares kay JO1 eumir jessie Co, ro naka-lock in duty nga jailguard ro anang bodyguard nga sibilyan bangud sa kahilungon.
Mag-eowas kara, may kahigayunan pa sigon nga bangud sa kahilungon hay gin-harrass nana ro nasambit nga jail guard ag gingabutan it baril.
Sa pihak nga parte, gin-aku ni Beñares nga ginpahatud nana sa terminal it bus paagto sa Iloilo ro anang bodyguard, apang bukon it sa nakalock-in duty nga bantay kundi sa andang outside duty personnel.
Kadungan kara, ginhangkat nana ro sa likod it malisyosong text nga magguwa ag pamatud-an ro anang alegasyon.
Nasayuran nga si Benares hay dati eon nga naging warden it BJMP-aklan ko 2013 sa pagpanaeasa it bagyong Yolanda.
