KALIBO, Aklan—May rekomendasyon eon ro Bureau of Jail Management and Penology ukon BJMP-Region 6 nga mabayluhan si Jail Inspector Eduardo Beñares, warden it jail facility sa probinsiya it aklan.
Raya ro ginkumpirma ni Jail Senior Supt. Gilbert Peremne, Director for Administration it BJMP Regional Office VI sa Bombo Radyo Kalibo.
Raya hay bilang kaparte sigon it andang nakataeanang pagbaeasa sa mga warden sa bilog nga western visayas bangud sa nagkaeain-eain nga rason.
Ro pag-relieve sigon kay Beñares hay aprubado eon it regional director ag nakaangkon eon sanda it resolusyon nga may petsang Disyembre 16, apang ginahueat pa nanda ro rekomendasyon angot kara it national headquarters nga nagapatigayon makaron it dugang nga evaluation ag assessment.
Naging ground suno kana it imbestigasyon ro mga reklamo kontra kay Beñares.
Madumduman nga nakabaton it text message ro BJMP-VI ko Nobyembre 29 halin sa sangka anonymous number nga naga-alegar nga ginpahatud ni Beñares kay JO1 Eumir Jessie Co, naka-lock in duty nga jailguard ro anang bodyguard nga sibilyan sa terminal it bus bangud sa kahilungon.
Mag-eowas kara, may kahigayunan pa sigon nga gin-harrass nana ro nasambit nga jail guard ag gingabutan it baril.
Gindugang pa ni Peremne nga ginaeauman eon ro pag-releive kay Beñares bangud nga bukon eon it maayos ro relasyon kara sa mga jail officers.
Ginaeauman sa unang mga inadlaw it Enero 2021 hay pagabayluhan eon ro nasambit nga warden, apang nagpamalibad anay nga magtau it detalye kon sin-o ro magabueos kana nga gin-aprubahan it andang board.
Dati eon suno kana nga na-assign sa BJMP-Aklan ro posibleng uman nga magadumaea sa nasambit nga jail facility.
Samtang, si Beñares hay indi anay pagataw-an it wardenship assignment ag temporaryo imaw nga igabutang sa regional office para sa mga minor functions.
