KALIBO, Aklan–Nagpangibabaw sa Game 5 it nagapadayun nga NBA Finals ro koponan it Golden State Warriors matapos nga piyerdihon ro Boston Celtics sa score nga 104 to 94.
Bangud kara, sambilog eon lang ro kinahang-ean nga daog it Warriors para mai-uli ro kampeonato makaron nga season.
Suno kay Banga Sangguniang Bayan member Jocel Rata nga manami ro ginpakita nga hampang it Warriors bangud naghampang sanda bilang sangka koponan umpisa it first hasta it 4th quarter.
Naobserbahan man kara nga bukon it pa it masyadong na-establisar ro diskarte it Celtics kaeakip ro andang technical assistance.
Ginpahayag dugang nga indi dapat mag-relax engkaso nga makaangkon it kahigayunan nga umabanse sa hampang sa baylo hay mas pang padayunon ro momentum agud nga makuhit ro kadaeag-an.
Sa makaron, 3 to 2 eon ro serye it daywang koponan.
