KALIBO, Aklan—Igapaguwa eon ro resulta it ginpatigayon nga uman nga pag-test it Bureau of Fisheries and Aquatic Resources ukon BFAR sa water sampling it mga baybayon sa banwa it Batan ag Batan Bay agud nga matumod kon may presensiya pa it red tide toxin sa nasambit nga mga lugar.
Raya ro ginpahayag ni Christian Nabayra , agricultural technologist it LGU-New Washington sa idaeum it Municipal Agricultural Office ukon MAO.
Suno kana ro igapaguwa nga resullta it ginbo-oe nga water ag meat sampling hay ginpatigayon ko Agosto 29 samtang posibleng igapaguwa man ro resulta it testing ko Setyembre 4 sa masunod nga domingo.
Ginpaathag nana nga nagakinahangean it tatlong sunud-sunod nga negative test agud nga matumod nga fully cleared sa red tide toxin ro mga apektadong lugar.
Ginpasiguro man ni Nabayra nga insigidang igapaguwa sa publiko ro magiging resulta it ginpatigayon nga testing.
Nagapabilin suno kana nga bawae kaunon makaron ro shellfish product kapareho it tahong, taeaba ag iba pa halin sa Batan Bay.
Madumduman nga bangud sa pagkalugi, nag apela ro mga negosyante it shellfish sa BFAR nga uman nga magpatigayon it laboratory test sa mga shellfish products nga ginakolekta sa nasambit nga mga baybayon.
Sa pihak kara, ginpasiguro it taeatapan nga eowas mat a nga kaunon ro mga isda, pusit, hipon ag mga alimango nga mabo-oe halin sa nasambit nga baybayon basta nga ro mga raya hay limpyuhan it mayad antes nga eaha-on ag kaunon.