KALIBO, Aklan — Bangud sa maeain nga tiempo, ginkansela anay it Philippine Coast Guard (PCG) sub-station Boracay ro tanan nga water sports activities sa isla.
Nagbutang sanda it red flag sa Bolabog area sa back beach nga senyales it pagsuspinde sa tanan nga klase it aktibidad sa lugar nga ginaeakipan it pagpaligos, sea sports ag island hopping.
Samtang sa pinaka-ulihi nga abiso it PCG, balik eon sa normal ro operasyon it motorbanca pasueod ag paguwa it Boracay nga ginsaylo sa Tambisaan-Tabon port, apang uman sigon nga magapaguwa it suspension order kon mas pang magbaskog ro hanging habagat ag humbak.
Padayun man ro biyahe it RoRo vessels paagto it Batangas ag Mindoro port samtang temporaryong ginkansela ro biyahe it mga baroto paagto sa Hambil ag Sta. Fe, Romblon.
Ap-at nga banwa man sa Aklan nga ginaeakipan it Makato, Numancia, Altavas ag Nabas ro nagsuspinde it klase sa tanan nga lebel sa pampubliko ag pribadong eskwelahan bangud sa maeain nga tiempo.
