KALIBO, Aklan—Kapin sa 6 nga kaso eamang it Violence against Women and Children ro nai-record it Women and Children Protection Desk ukon WCPD it Kalibo Municipal Police Station sa unang quarter it makaron nga dag-on sa tunga it Coronavirus Disease 2019 ukon COVID-19 pandemic.
Suno kay Police Lt. Col. Belshazzar Villanoche, hepe it kalibo PNP nga raya hay manaba kumpara sa 9 nga nailista sa kaparehong period ko nagtaliwan nga dag-on.
Sa 6 nga nailistang kaso, ap-at kara ro natigayon eon nga makasuhan ag ro daywang iba pa hay nakataeanang igapasaka.
Nagnaba suno kay Villanoche it haeos 30% ro mga kaso makaron nga 2021 bangud sa naexperiensiyahan nga COVID-19 pandemic.
Kaeabanan sigon sa mga ginpasaka nga reklamo hay ro rape, sexual assault, sexual harassment ag iba pa nga kaabuan hay ginaeakutan it mga menor de edad.
Ginlaygay pa ni Villanoche nga bangud nga ro violence against women and their children hay sangka public crime, pwede raya nga ireklamo it maskin sin-o man nga may kasayuran sa kaso ukon natabu nga pagpang-abuso.
Mag-eowas sa pulisya , pwede man nga magdangop sa mga barangay VAW desk officers.
Pinaka-ulihi sigon sa andang nailistang kaso hay ro pagpanghimueos it sangka ama sa anang pitong dag-on nga unga.
