KALIBO, Aklan—Magabiyahe eon sa Hulyo 22 paagto sa Marikina City ro mga atleta it Western Visayas agud nga magpasakop sa Palarong Pambansa 2023 nga maga-umpisa sa Hulyo 29 hasta Agosto 5.
Suno kay Jovie Ote, coach it athletics nga 14 tanan nga atleta halin sa Aklan ro magasabak sa Palarong Pambansa nga ginaeakipan it 4 sa secondary ag 10 sa elementary boys and girls.
Sa kabilugan ro Western Visayas hay may 539 nga players mag-eowas pa sa 131 coaches, assistant coaches ag chaperones kamana man ro 143 nga technical working group.
Bangud nga power house sigon ro region 6 sa andang cluster, kun sa siin gindomina nanda ro tanan nga mga event, mabahoe ro tsansa nga makahakot it maabu nga medalya ag makaangkon it bag-ong mga records partikular sa athletics kumpara sa nagtaliwan nga sporting event ko 2019 antes ro pagtama it pandemya.
Sa makaron hay haum eon ro mga atleta halin sa Western Visayas ag target nga maangkon ro kampeonato makaron nga dag-on.
Ginpahayag ni coach Ote nga ro magadaog makaron sa Palarong Pambansa hay iga-ranggo base sa numero it mga gold medals nga nahakot.
Sa nagtaliwan nga palaro, naangkon it Western Visayas ro ikatlong pwesto.
Ro billeting area it Region 6 hay sa Kalumpang Elementary School, Kalumpang National High School ag Marikina Science High School.
