KALIBO, Aklan—Padayun ro ginahimo nga pagbutang it border control it Office of the Provincial Veterinarian (OPVET) para masiguro nga owa it makasueod nga kontaminadong karne it baboy sa probinsya it Aklan.
Suno kay Dr. Joseph Lachica it OPVET-Aklan nga nagapabilin nga eowas sa paeag it African Swine Fever (ASF) ro bilog nga Western Visayas.
Sambilog sigon ro rehiyon sa naga-supply it karne it baboy sa mga ASF affected areas kapareho it Metro Manila.
Suno kana, halin ko buean it Enero hasta Marso hay sigidas ro pagpagguwa it probinsya it mga live hogs paadto it National Capital Region (NCR).
Tuyo sigon kara nga mapabilin nga bastante ro supply it karne sa nasambit nga lugar.
Ro mga ASF free sigon nga rehiyon ag probinsya hay pwedeng makapadaea it live hogs ukon pork products sa mga ASF affected areas basta magpakita eamang it nagakaigo nga dokumento.
Sa pihak kara, nag-apela man si Dr. Lachica sa publiko nga likawan anay ro pagbakae it mga pork products online eabi eon kun maghalin sa guwa it Western Visayas.
Dapat sigon nga tangkilikon anay it mga pumueoyo ro pagbakae it mga local products.
