Sangka distillery sa New England, New Hampshire ro naglunsar it kakaibang aeak, ro whiskey nga ro sambilog sa main ingredients hay alimasag!
Sambilog sa mabahoe nga problema makaron it mga mangingisda sa New Hamphire ro mga alimasag nga ginatawag nanda nga green crabs.
Ginakonsidera kato nga peste ro mga green crabs bangud nga gina-ubos kara ro mga isda, kabibe ag iba pang mga lamandagat nga dapat hay nagatau it pangabuhian sa mga mangingisda idtu.
Bangud sa nasambit nga problema, nagbueuligan ro distillery nga Tamworth Distilling ag University of New Hampshire NH Green Crab Project nga magdebelop it aeak nga ginatawag nanda nga “Crab Trapper”.
Suno sa tag-ana it Tamworth Distilling nga si Steven Grasse, nag-eaga sanda it 40 kilos it green crab.
Pagkatapos mabo-oe ro anang broth ukon sabaw, ginhalo nanda raya sa aeak ag ginbutang sa rotary vacuum para sa distilling process.
Una nanda nga ginpasamat ro aeak sa mga mangingisda it New Hampshire ag nagustuhan it kaabuan ro lasa kara.
Suno sa sangka mangingisda, gin describe nanda ro Crab Trapper bilang “made with a bourbon base steeped with crab flavor, corn and spice blend mixture”.
Nagabalor it $65 dollars ro 750 ml nga bote it Crab Trapper.
