KALIBO, Aklan–Masyado eon nga manaba ro level it coliform content sa white beach, ukon ro baybayon nga kaeabanan nga ginapaligsan it mga turista sa isla it Boracay.
Suno kay Natividad Bernardino, general manager it Boracay Inter-Agency Rehabilitation Management Group (BIARMG) nga raya hay indikasyon nga malimpyo eon ro tubi sa lugar.
Raya hay kasunod it hugut nga pagpatuman it 25+5 meter easement rule sa baybay ukon distansiya it anuman nga istraktura sa dagat.
Gindugang pa ni Bernardino nga ro average nga fecal coliform level sa white beach hay “10 most probable number per 100 milliliters” kumpara sa nailistang 900 mpn per 100 ml antes nga ginpasarado ro isla may daywang dag-on ro nagtaliwan.
Ro “ideal” sigon nga coliform level agud nga mapaligsan ag hiwatan it iba pang mga water sports activities it mga turista ag residente hay 100 mpn per 100 ml.
Sa pihak nga parte, kabilugan nga 113 nga illegal structures sa Wetland No. 6 ro natigayon eon nga ma-demolish, kun sa siin ro masobra sa 30 nga mga tumandok nga pamilya hay ginsaylo sa eugta nga gintau kanda it Department of Agrarian Reform ko buean it Marso.
