KALIBO, Aklan–Ginpaathag it sangka eksperto nga ro bag-ong sublineages BA 2.12 ag BA 2.12.1 ro nagakalhit makaron sa estados unidos nga nakasueod eon man sa Pilipinas.
Suno kay Dr. Philip Ian Padilla, public health expert ag vice chancellor for academic affairs it University of the Philippine ukon UP Visayas nga padayun nga ginatun-an it world health organization ro Omicron sublineages angot sa kadasig kara nga magtapon ag kon ano ka-grabe ro sakit nga pwedeng ituga kara sa pasyente.
Apang base suno kana sa paunang datos, may una raya nga mataas nga transmissibility rate.
Sa pihak kara, ginpahayag sigon it department of health ukon DOH nga owa pa it pamatuod nga nagatuga raya it grabeng sakit.
Padayun man suno kana nga nakabantay ro mga otoridad angot sa bag-ong mutation it omicron.
Gindugang pa ni Dr. Padilla nga owa pa ginadeklarang bag-ong variant of interest ukon variant of concern ro BA.2.12.
Padayun man nana nga ginapadumdum ro publiko nga magdahan ag obrahon sa gihapon ro health protocol kapareho it pagsuksok it face mask ag likawan nga makipagdueutdutan kamana man nga magpabakuna ukon magpabooster shot kontra sa COVID 19.
Nasayuran nga sangka 52 anyos nga babayeng finnish ro nag-abot sa nasyon ko Abril 2 nga nadetect nga carrier it nasambit nga variant.
