KALIBO, Aklan—Mabahoe nga kadungganan para sa mga pumueoyong Pilipino ag opurtunidad para sa mga Filipino teacher ro tanyag makaron it it Harvard University.
Raya ro naging komento ni Bombo International Correspondent Greg Aguilar it California, USA kasunod it anunsyo it nasambit nga unibersidad nga sa kauna-unahang kahigayunan hay igatanyag nanda ro kurso sa Wikang Tagalog.
Angot kara, ginaeauman nga magabuoe it mga manugturo sa Wikang Filipino ro Department of South Asian Studies it Harvard nga maga-umpisa raya sa academic year 2023-2024.
Ginpahayag dugang ni Aguilar nga makapamayad raya sa mga Pinoy nga presente eon nga naga-istar sa Estados Unidos bangud nga nataw-an it igtaeopangod ro kaugalingon nanda nga lenggwahe.
Nauna eon nga ginaturo sa prestihiyosong unibersidad sa Amerika, ro mga wikang Thai ag Bahasa Indonesia.
Ro mahire nga manugturong Tagalog sa Harvard hay ginaeauman nga magaturo idto sa sueod it tatlo hasta limang dag-on.
Ginakabig man raya nga tikang para makaengganyo it mga estudyante nga istudyuhan ro Southeast Asia.
