KALIBO, Aklan — Agud nga mapahagan-hagan ro paggutok it daeagan it mga saeakyan sa Jakarta, ginmandu ni President Joko Widodo ro work-from-home set-up kadungan sa pagpatigayon it misa ni Pope Francis, adlaw it Huwebes sa sambilog sa pinakamabahoe nga stadium sa nasambit nga siyudad.
Suno kay Ginavella Limpin Cumla, Bombo International Correspondent sa Indonesia nga ro misa ag pagtau it sermon it Santo Papa hay ginpatigayon sa 80,000-seater national football stadium it Indonesia.
Maskin suno kana nga alas-5:00 pa it hapon ro misa, apang gin-umpisahan eon ro pilang mga religious activities bandang alas-12:00 it udtro adlaw.
Bilang manugturo sa sangka catholic school, obligado sigon ro pila sa andang mga estudyante nga magtambong sa event.
Samtang, naga-abot sa masobra sa 4,700 nga kapulisan ro gindeploy it gobyerno para sa mas hugut nga seguridad.
Maskin nga dominado it muslim ro Indonesia, ginpahayag ni Cumla nga manami nga isipon nga maabu nga tawo ro mainit nga nag-welcome sa santo papa ag nagwagayway it mga bandera sa kilid it daeanon nga gin-agyan kara paagto sa embahada it Vatican sa Central Jakarta.
Ro mga nag-asikaso man sigon sa tanan nana nga mga kinahangeanon it event hay puro mga muslim.
Dugang pa nga owa eon nagbo-oe it hotel ro Santo Papa nga maistaran kundi nga mas ginpili nana nga magtinir sa kabilugan it anang pagbisita sa andang embahada .
Mag-eowas kay President Widodo, nakipagkita man si Pope Francis sa grand imam ukon representante it Istiqlal Mosque, ro pinakamabahoe sa Southeast Asia ag ro simbolo it religious co-existence.
Nagkita sanda sa tunnel nga nagapatunga sa magkatabok nga moske ag simbahang katolika.
Sa pihak nga parte, ginpahayag ni Cumla nga haeos tanan nga Filipino community sa Indonesia hay nakaangkon it papel sa papal visit bangud nga kaabuan kanda hay eakot sa mga church organizations.
Ko Martes nga adlaw hay nag-abot si Pope Francis sa Indonesia para sa tatlong araw nga pagbisita sa mga Katoliko sa pag-umpisa it anang four-nation tour sa Asia Pacific kaibahan ro Papua New Guinea, East Timor ag Singapore.
Nag-abot sa Indonesia si Pope Francis nga naka-wheelchair bangud sa anang ikamayad nga eawas kun sa siin hay nagpaidaeum imaw sa hernia surgery ko 2023 ag naka-eksperyensiya it respiratory issues.
Kaibahan nana sa anang biyahe sa Cardinal Luis Tagle .
