KALIBO, Aklan—Ginaeauman nga mas pang magataas ro numero it mga turistang magabisita sa isla it Boracay sa oras nga mag-umpisa eon ro tatlong bag-ong programa it Department of Tourism (DoT).
Suno kay Malay Tourism Officer Felix delos Santos sa pamaagi it ginaduso nga programa it ahensiya nga Boracay Biking Tour, Food Crawl ag Wellness Workation Program hay madasig nga makabawi ro isla bangud makahatak raya it maabo nga turista.
Dugang pa ni delos Santos kung naabot eon ro herd immunity sa Boracay hay pagabuksan eon man nanda ro travel bubble sa mga nasyon it China, Taiwan ag Korea.
Patok sigon makaron sa isla ro ‘trabaho samtang bakasyon’ eabi eon sa pilang mga empleyadong online ro trabaho.
Nauna eon nga gintaw-an ro Boracay kaibahan ro pilang mga tourism establishments it ‘Safe Travels Stamp’ it World Travel and Tourism Council (WTTC) bangud sa ginapatuman nga health and safety protocols nga pasado sa bilog nga kalibutan.
