KALIBO, Aklan—Opisyal nga gintau ni Department of Tourism Secretary Bernadette Romulo-Puyat kanday Aklan Governor Florencio Miraflores ag Malay Mayor Frolibar Bautista ro World Travel and Tourism Council (WTTC) Safe Travels stamp bilang pagkilaea sa ginapatuman nga health protocol nga pasado sa bilog nga kalibutan.
Ginpaathag ni Malay tourism officer Felix Delos Santos nga ro WTTC Safe Travels stamp hay ro kauna-unahan nga global safety and hygiene stamp sa bilog nga kalibutan.
Raya hay nagakahueugan nga pwede eon nga magbaton eon man it international tourists ro Boracay matapos nga makapasa ro ginapatuman nga world class nga health and hygiene protocols it gobyerno ag mga negosyo sa isla.
Raya man sigon ro rason kon ham-an nga ginapadasig nanda ro pag-rolyo it bakuna agud nga maabot ro herd immunity halin sa haeos 38,000 nga mga residente ag trabahador sa Boracay.
Pinaagi kara hay mas pang magbaskog ro kumpiyansa it mga dumueuong nga turista nga eowas nga magbakasyon sa isla.
Gindugang pa ni Delos Santos nga 11 pa nga mga hotel pa ro nakabaton it certificate halin sa WTTC.
Mabahoe sigon nga bulig ro pagkilaea agud nga amat-amat eon nga makabalik ro industriya it turismo bukon eamang sa Boracay kundi sa bilog nga nasyon.
Ro Boracay hay naga average makaron it daily visitors arrival nga 800 hasta 1,000.
