KALIBO, Aklan—Pormal eon nga nagtapos ro 2024 Western Visayas Regional Athletic Association ukon WVRAA Meet nga ginhost it Negros Occidental.
Suno kay Hernani Escullar Jr., spokesman it Department of Education ukon DepEd Region 6 nga kapareho sa opening ceremony ko Mayo 2, ro closing ceremony hay ginpatigayon gihapon sa Panaad Park and Stadium sa Bacolod City.
Kadungan kara hay ro pagtau it special awards sa mga participants kapareho it best in saludo, best in uniform, cleanest and greenest delegation , most disciplined delegation ag most festive kamana man ro overall champion sa elementary ag secondary level .
Dugang pa ni Escullar nga pangkabilugan nga naging madinaeag-on ro dag-unan nga sporting event nga ginpasakupan it kapin sa 2,976 nga student athletes sa elementary hasta sa senior high school halin sa an-um nga probinsiya it region 6 nga nag-compete sa nagkaeain-eain nga sports disciplines bilang pagpahaum sa Palarong Pambansa sa Cebu sa buean it Hulyo 9 hasta 16.
Owa suno kana it may natabu nga anuman nga untoward incidents ukon mga hitabu nga nabutang sa peligro ro mga participants kasunod sa pag-adjust sa oras it mga pahampang tuga it mataas nga heat index.
Ginpasaeamatan man it deped ro pagco-host it lokal nga gobyerno it Negros Occidental ag Bacolod City sa WVRAA 2024.
Naging hugut man ro seguridad nga ginpatuman it Bacolod City Police Office sa mga lugar nga ginhiwatan it kompetisyon ag gin-istaran it mga atleta.
