Kalibo Aklan ———Ginkumpirma ni Rebecca Ibarreta it Department of Education (DepEd)-Aklan nga madayon eon ro pag-arangkada it Western Visayas Regional Athletic Association (WVRAA) Meet 2020 sa Marso 21 hasta it 28 sa probinsya it Aklan.
Raya sigon ro naging resulta it ginpatigayon nga Regional Management Committee (ManCom) kaibahan ro tanan nga 20 nga Schools Division Offices.
Ginpahayag dugang nga indi eon pwede ma-isoe ro nasambitang aktibidad bangud nga magapahaom rayon sanda sa graduation ceremony it mga estudyante.
Suno pa kay Ibarretta, matapos ro WVRAA hay igapahaom man nanda ro mga estudyanteng qualified nga magasabak sa palarong pambansa sa Mayo 1 hasta it 8.
Nasayuran nga nauna eon nga ginpaiway ro WVRAA meet ko Pebrero 15 hasta it 22 it presenteng dag-on matapos nga gin-rekomenda it Provincial Health Office ag Provincial Government it Aklan bangud sa coronavirus infectious disease (COVID-19).
Sa makaron suno kana hay preparado eon ro tanan nga playing venues, billeting schools ag iba pa para sa dag-unan nga regional sporting event.
