Kabilugan nga naging madinaeag-on, malinong ag matawhay ro ginpatigayon nga Western Visayas Regional Athletic Association ukon WVRAA Meet 2023 sa probinsya it Aklan.
Suno kay PCapt. Aubrey Ayon, tagapaghambae it Aklan Police Provincial Office nga uwa sanda it nailista nga anuman nga untoward incident sa kabilugan it regional event mag-eowas eon lang sa mga nagakalipong bangud sa tuman nga kainit it panyempo nga insigida man nga naeapatan it medikasyon it naka-standby nga medical emergency response unit.
Madinaeag-on sigon ro andang ginlatag nga security plan bangud nga ko 2020 pa raya nakahaom ag gin-enhance eon lang nanda makaron nga dag-on.
Ginsiguro nanda ro kaeowasan it tanan nga mga delegado bangud nga may gintaeana nga police personnel maghalin sa mga billeting areas hasta sa mga playing venues halin sa umpisa hasta sa natapos ro event.
