Matapos ro haeos tatlong dag-on nga pagkasuspinde bangud sa COVID-19 pandemic, uman nga nagbukas ro Western Visayas Regional Athletic Association (WVRAA) Meet 2023 sa Calangcang Sports Complex sa banwa it Makato.
Suno kay DepEd Region 6 spokesperson Hernani Escullar nga ro tema it tournament makaron nga dag-on nga “Championing Excellence through Sports,” hay gin-conceptualize mismo ni Dr. Ramir B. Uytico, DepEd-6 regional director bangud sa pagpati nga ro Western Visayas hay ginahalinan it mga kampeon.
Ro nasambit nga sporting event hay gin-umpisahan pinaagi sa parada it mga atleta halin sa Aklan, Antique, Capiz, Iloilo, ag Negros Occidental sa nasambit nga sports complex kun sa siin pagahiwaton ro kaabuan nga hampang.
Si Department of the Interior and Local Government (DILG) Sec. Benhur Abalos ro sambilog sa mga imbitadong bisita sa pormal nga pagbukas it WVRAA.
Ginatantiya nga kapin sa 5,000 nga delegado nga ginaeakpan it athleta, coaches, chaperones, trainers ag opisyal kamana man it technical officials ag technical working groups ro magapasakop sa regional sports meet.
Samtang, ginpahayag pa ni Escullar nga ginataw-an nanda it prayoridad ro ikamayad nga eawas it mga delegado, technical officials ag iba pang personnel it DepEd bangud sa sobrang init it paniempo.
Magataeana man it special lanes sa Aklan Provincial Hospital para sa mga delegadong magakinahangean it insigidang pagtatap.
May gindeploy man nga mga ambulansiya kaibahan ro standby ag medical teams sa tanan nga mga venues it events.
Sa pihak nga parte, ginatos nga mga pulis halin sa Aklan Police Provincial Office ro ginpakalhit agud nga magbantay sa sports activities.
May una nga 24 nga sporting events para sa seconday division ag 15 sa elementarya kun sa siin masobra sa 2,000 medalya ro nakataya.
Magatapos ro WVRAA Meet sa Abril 30.
Dikara pagapilion ro igapadaeang delegasyon it Western Visayas para sa Palarong Pambansa 2023 sa Marikina City sa Hulyo 29 hasta Agosto 5
