KALIBO, Aklan—Gindeklara it Department of Education ukon DepEd-Aklan nga naging madinaeag-on ro bag-o eamang natapos nga Westen Visayas Regional Athletic Association ukon WVRAA meet 2023.
Suno kay Dr. Feliciano Buenafe, Jr. Schools Division Superintendent it Department of Education ukon DepEd-Aklan nga maskin nga may nasumaeang nga mga hangkat, partikular ro patay-sindi nga supply it kuryente ag kakueangan it supply it tubi sa pilang billeting quarters hay natigayon man eagi nga mausuyan it solusyon.
Puro positibo sigon nga feedback ro andang nababatian nga eubus nanda nga ginapasaeamatan ag ginakalipay kaibahan ro provincial government it Aklan.
Sa pihak nga parte, malipayon si Dr. Buenafe nga naabot ro andang tgarget nga mabutang sa ikatlong pwesto ro Aklan kasunod it mga powerhouse team nga Iloilo ag Negros Occidental.
Mabahoe nga bulig suno kana ro home court advantage sa pagpursige it mga atleta halin sa Aklan.
Ginpaabot man it opisyal sa mga atleta nga ro maging kaparte it andang delegasyon ag makapasakop sa WVRAA makaron nga dag-on hay makabig sanda nga daog tanan.
Gin congratulate man nana ro tanan nga nakabo-oe it medalya sa andang natungdan nga mga hampang kaibahan ro mga coaches ag opisyal it kada delegasyon.
Madumduman nga uman nga nabawi it Iloilo ro overall title sa WVRAA Meet 2023 sa Aklan Sports Complex sa Brgy. Calangcang sa banwa it Makato.
Sa awarding ceremony, gindeklara ro Iloilo bilang over-all champion it WVRAA meet matapos makabo-oe it 212-gold, 139-silver ag 92 bronze medals sa elementary, secondary ag para games.
Sa ikaywang puwesto ro Negros Occidental nga nagkampeon ko WVRAA 2019 nga may 166-gold, 165-silver ag 118-bronze medals samtang ro host province nga Aklan hay una sa ikatlong puwesto nga may 35-gold, 62-silver ag 108-bronze medals.
Ro special awards hay naagto sa Capiz para sa Most Disciplined Delegation samtang ro Guimaras ro Best in Uniform, Best in Saludo ag Most Festive Delegation.
