Makabig nga naging madinaeag-on ro pormal nga pagbukas it Western Visayas Regional Athletic Association (WVRAA) Meet 2023 kahapon nga adlaw, Abril 26 sa Calangcang Sports Complex sa banwa it Makato.
Raya hay sa pihak nga limitado ro oras para sa preparasyon it opening ceremony it nasambit nga sporting event.
Mabahoe ro pagpasaeamat ni DepEd Region 6 spokesperson Hernani Escullar bangud sa bulig it manami nga partnership it Department of Education Region 6 sa lokal nga gobyerno it probinsya it Aklan hay naging deri-deritso ro nasambit nga programa.
Suno kana, sambilog sa gin-antisipar nanda nga maging problema hay ro tuman kainit nga panyempo.
Angot kara, ro mga igapatigayon nga outdoor games nga naga-umpisa it alas-10 it agahon hasta alas-3 it hapon hay temporaryo nga igapaiway para malikawan ro pilang ka mga insidente bangud sa kainit nga nae-eksperyensyahan makaron sa probinsya.
Sa pihak nga parte, ro magapangibabaw nga mga atleta sa WVRAA 2023 hay igarepresenta ro bilog nga Region 6 para sa pre-palarong pambansa nga igapatigayon sa Cebu City sa buean it Hunyo antes nga sumabak sa palarong pambansa nga igapatigayon sa Marikina City.
