KALIBO, Aklan—Naging madinaeag-on ro ginpatigayon nga sang dominggo nga regional sporting events sa probinsya it Antique halin ko Marso 1 hasta it 8.
Suno kay Mr. Hernani Escullar Jr, tagapaghambae it Department of Education ukon DepEd region VI nga sa bulig it mga stakeholders ag mga lokal nga gobyerno it natungdan nga ka-probinsyahanan hay naging madinaeag-on ro Western Visayas Regional Athletic Association ukon WVRAA meet 2025.
Ginpahayag dugang nga uwa it natabo nga major untoward incident sa kabilugan it mga sporting events mag-eowas lang kat ginsaylo ro hampang it volleyball girls secondary sa mas mabahoe nga gymnasium sa Binirayan Sports Complex bangud sa pagdagsa it mga tumaean-aw.
Raya hay matapos nga sa unang kahigayunan, nakasueod ro Antique sa championship kontra sa powerhouse team nga Negros Occidental kadungan sa pagtuhaw it instant volleyball sensation ag crowd’s favorite nga captain ball it Tay Tung Volleyball Team nga si Brianna Nikola Ang.
Base sa over all ranking, nagpanguna ro probinsya it Iloilo, ginsundan it Negros Occidental, nagpabilin sa pangatlong pwesto ro Aklan, nagpang ap-at ro Capiz, ginsundan it Antique ag una gihapon sa ulihing pwesto ro probinsya it Guimaras.
Ro masunod nga regional sporting events hay igapatigayon sa Passi City sa probinsya it Iloilo.
Sa makaron suno kay Escullar hay paga-umpisahan eon ro pagpahaom, pag-training ag iba pa para sa paaeabuton nga palarong pambansa nga igapatigayon sa Laoag City, Ilocos Norte sa Mayo 24-30, 2025.
