Owa it anuman nga nailistang problema sa ikatlong adlaw it nagapadayun nga Western Visayas Regional Athletic Association ukon WVRAA meet 2026 nga gin-host sa kauna-unahan nga kahigayunan it Passi City.
Suno kay Hernani Escullar Jr., spokesperson it Department of Education Regional Office 6 nga owa sanda it may nabaton nga mga negative feedbacks halin sa mga delegasyon it nagkaeain-eain nga schools division kaibahan ro mga playing venues ag billeting it mga atleta.
Sa makaron hay haeos 30 porsiyento pa eamang it mga sporting events ro natapos kun sa siin maabu pa nga mga medalya ro paga-agawan it waeong schools division nga nagpasakop.
Dugang pa nga owa sanda it nakita nga diperensiya sa dating nakasanayan nga per province ro delegasyon kumpara makaron nga kada schools division mag-eowas nga nag-abu ro numero it mga naga-compete nga delegasyon.
Sa pihak nga parte, gindugang pa ni Escullar nga may pilang mga atleta ro naninahan, apang insigida man nga gin respondehan it mga naka standby nga medical team nga gindeploy it City government it Passi ag ko DepEd.
Maskin ro mga nagakatabu nga kinagamo sa mga playing venues hay insigida man nga natapna bangud sa nakabantay nga mga kapulisan.
Nagapabilin suno kana sa ikatlong pwesto ro palaban nga Mighty Maroons it Aklan sa overall medal tally sa elementary, secondary ag para-games.
Pagkatapos it limang adlaw nga competition sa domingo nga adlaw, Marso 22, masayuran ro masunod nga school division nga maga-host it WVRAA.
Ro magakampeon ukon makaangkon it gold medal nga atleta sa kada pahampang hay imaw ro ma-qualify sa maabot nga Palarong Pambansa sa Agusan sa buean it Mayo sa idaeum it bandera it Western Visayas.
