KALIBO, Aklan—Nagapanguna eon makaron sa kabilugan it nagapadayon nga Palarong Pambansa 2023 sa Marikina City ro Western Visayas Regional Athletic Assiocation ukon WVRRA.
Raya hay matapos nga nakakuhit eon ro rehiyon it 74 ka mga medalya nga ginakaeakipan it 33 nga gold; silver nga 23 ag 18 nga bronze medals hasta alas-9:00 kabie.
Nagasunod ro NCRAA nga may 24 nga gold; 27 ro silver ag 23 nga bronze ukon kabilugan nga 74 man nga mga medalya.
Kamana man nagpangatlo sa partial and unofficial medal standing ro IV-A STCAA nga may kabilugang 75 ka mga medalya nga ginakaeakipan it 22 nga gold; 30 nga silver ag 23 nga bronze medals.
Angot kara, ginpahayag ni Department of Education ukon DepEd region VI spokesperson Mr. Hernani Escullar Jr. nga eubus gid ro andang kalipay ag pagpangamuyo nga magapadayon ro manami nga resulta it hinampang.
Positibo man sanda nga magapabor kanda ro mga nabilin pang hampang it mga atleta.
Pursigido sanda nga mapanindugan ro bansag nga “Home of the Champions” ro rehiyon it Western Visayas.
