KALIBO, Aklan—Nagtao it mabahoe nga leksyon sa maabo nga Pilipino ro pagpanaeasa it Super Typhoon Yolanda ko Noyembre 8, 2013 kung siin grabeng naapektuhan kara ro mga lugar sa Visayas.
Waeong dag-on eon ro nagtaliwan apang preska gihapon sa pini-ino it kada isaea ro kalbaryo nga gintuga it sambilog sa pinakamabaskog nga bagyo sa kasaysayan it nasyon.
Suno kay Mr. Galo Ibardolasa, Action man it Provincial Disaster Risk Reduction and Management Council (PDRRMC)-Aklan nga tatlong adlaw antes ro paglandfall it bagyong Yolanda sa kaeugtaan it Leyte hay sigidas eon ro andang ginpatigayun nga monitoring para tempranong maabisuhan ro mga pumueoyo.
Aminado si Ibardolasa nga owa nanda gina-ekspektar ro kabaskog it hangin nga daea it Yolanda.
Apisar nga owa naglandfall sa Aklan ro bagyo, nag-aywan man raya it mabahoe nga kahalitan sa agrikultura, kasapatan ag propyedad.
Maabo nga mga panimaeay ro ginpahapa it bagyo ag may pila pang namatay.
