Sangka beauty vlogger sa Japan ro nakabaton it pagpangbatikos halin sa mga netizens matapos nga piliton kara ro siyam nga dag-on nga unga nga magpa-cosmetic surgery!
Sa Japan, ginapasugtan nga magpaidaeum sa plastic surgery ro mga menor de edad kon may consent ro mga ginikanan ukon legal guardian kara.
Suno sa report it sangka online magazine, pila sa mga ginikanan sa Japan ro gina engganyo pa ro andang mga unga nga magparetoke it itsura agud nga maggwapa .
Gin-aku it YouTube beauty vlogger nga si Rucchi, ginpilit nana ro anang siyam nga dag-on nga unga nga magpa-Blepha-ro-plasty operation ukon double eyelid surgery.
Ro Blepha-ro-plasty hay cosmetic surgery nga pagbutang it kinit sa talukap it mata agud nga maging itsurang bilog ro singkit nga mata.
Kat ginpangutana si Rucchi kun ham-an imaw nga nagamadali nga magparetoke ro unga, sa anang panan-awan hay mas makaangkon it advantage ro anang unga nga si Micchi kon unga pa eamang hay nagpa-gwapa eon raya pinaagi sa plastic surgery.
Suno kay Rucchi, 18-anyos imaw unang nagparetoke ag sa tan-aw nana hay mas naging manami ro daeagan it anang kabuhi ag career kun temprano imaw nga nagpaayos it itsura.
Nag-gatos si Rucchi it 400,000 Yen para sa Blepharoplasty surgery it unga ag nagbuhay eamang it 20 minutos.
Apang bangud nga masyado pang bata si Micchi, nakaangkon it komplikasyon ag nagbuhay ro surgery it daywang oras.
Naging madinaeag-on ro surgery ag matapos ro pilang domingo hay nag-ueat eon ro mga nina sa mata ni Micchi.
Apang suno sa unga, owa imaw it nataeupangdan nga pagbag-o sa anang kabuhi matapos maretoke ro mata.
Matapos ma-publish sa magazine ro interview sa mag-ina nakabaton it kritisismo ag pagbatikos si Rucchi.
Maabung netizens ro nag engganyo sa mga awtoridad nga ibawae ro plastic surgery sa mga menor de edad eabi eon kon bukon man raya it sangka emergency medical situation.
