KALIBO, Aklan — Nagapati ro batikang abogado nga si Atty. Axel Gonzales nga masyadong naging kampante si dating Ako Bicol Party-list Rep. Zaldy Co sa pag-libot sa Europe rason nga owa nana ginaeauman nga madakpan sa hana nga pagsueod sa Germany samtang sa border it Czech Republic.
Nasayuran nga base sa impormasyon, halin sa Portugal hay nagwarang sa nagkaeain-eain nga nasyon sa Europe si Co kapareho it France hasta nga naka-abot imaw sa Czech Republic.
Samtang, mabahoe suno kana ro posibilidad nga mapabalik sa Pilipinas si Co.
Bangud nga owa it balidong travel document ag kanselado pa ro Philippine passport, ginakabig si Co nga unwanted alien rason nga gindakop ag ginkulong imaw.
Ginpaathag pa kara nga maskin nga owa it extradition treaty ro Pilipinas ag Czech Republic, pwedeng mapabalik sa nasyon ro dating kongresista sa oras nga imaw hay ipa-deport.
Sa pihak nga parte, engkaso nga makaangkon it cover-up, ginpahayag ni Atty. Gonzales nga posibleng akuon eon lang tanan ni Co ro saea bangud nga maskin nga magturo imaw it iba nana nga naging kasabwat hay owa man gihapon imaw it lusot sa kaso.
Abangan eon lang sigon ro masunod nga kabanata sa oras nga maka-uli imaw sa nasyon.
Si Co ro sambilog sa ginakabig nga “big fish” sa flood control scam.
