KALIBO, Aklan— Target makaron it pulisya nga maging “zero crime incident” ro selebarsyon it Kalibo Sto. Niño Ati-atihan festival 2019.
Suno kay PCI Bernard Ufano, Provincial Intelligence Branch (PIB)-Aklan, hugot sa makaron ro andang ginahimo nga monitoring sa bilog nga probinsya it Aklan agud nga masiguro ro kaeowasan it mga naga-merry making.
Sigidas ro andang pagpangusisa sa mga tawong imbolbado sa pila ka mga krimen bukon eamang it iya sa Aklan kundi maging sa mga kaeapit nga probinsya agud nga inde eon ro mga raya makaeusot ag makahalit sa iba.
May kaangtanan kara, agud nga maging masinadyahon ro selebrasyon, ginsuhestyon ni Ufano nga maging mapagmatyag ro tanan sa andang palibot kon una eon sa sueod it festival zone nga inde mabiktima it salisi, panakawan, pick pocketer ag maabo pang iba.
Hugot man sigon nandang ipatuman ro pagsikyar sa mga daea nga belongings it mga bisita agud nga malikawan nga makapasueod it mga deadly weapon sa mismong festival zone para eon man sa seguridad it mga deboto ni Sr. Sto. Niño De Kalibo.
Ginsuhestyon dugang nga inde magdungan ro bilog nga pamilya sa kasadyahan kon siin kinahang-ean suno kana nga may maaywanan sa andang mga panimaeay agud nga inde mataw-an it kahigayunan nga makapametaha ro mga manakaw.
