KALIBO, Aklan—Ginpabugae it pamunuan it Malay Municipal Police Station nga naging epektibo ro andang ginplastar nga police strategy kasunod it selebrasyon it Semana Santa sa isla it Boracay.
Suno kay Police Lieutenant Colonel Don Dicksie De Dios, hepe it Malay Municipal Police Station nga nakalista sanda it zero incident umpisa Abril 11 hasta 17.
Raya hay matapos nga magdeklara sanda it full alert status ko Abril 10 para masiguro ro kaeuwasan it mga turista.
Nagpatuman man ro lokal nga gobyerno it “one entry, one exit policy” para masiguro nga indi maeabag sa health and safety protocols.
Mag-euwas kara, naging pro-active man sigon ro mga kapulisan sa pagtao it seguridad sa mga bakasyunista.
Nasayuran nga ko Huwebes Santo nakalista ro Malay Tourism Office it haeos 14,000 nga tourists arrival sa sueod it sang adlaw sa unang kahigayunan umpisa nga mag-eupok ro pandemya.
Bangud sa mataas nga influx it tawo rason nga haeos nagkaubusan eon it mga e-trike ag van sa Boracay.
