KALIBO, Aklan—Ginklaro ni Ex-Officio Member it Sangguniang Bayan Ronald Marte nga tig sambilog eamang ro ginapanupod nga home quarantine pass sa sangka household agud nga malikawan ro influx it maabong tawo sa guwa it komunidad partikular sa banwa it Kalibo.
Suno kana, ginpakamayad nanda nga ipamaeay-baeay ro Qpass agud nga maidentify kon sin-o ro pwede nga magguwa kanda agud nga magbakae ag mag-usoy sa andang mga kinahang-eanon sa sueod it panimaeay.
Mag-eowas kara, hugot nga ginaimplementar it tagsa ka baryo ro ginapatuman nga curfew sandig sa ginpaguwang Executive Order ni Aklan Governor Florencio Muraflores kon sa siin 24/7 nga nakabantay ro mga barangay tanod.
May kaangtanan kara, hugot man ro andang padumdom sa mga senior citizen nga inde magguwa it andang panimaeay mas kapin pa kon may mga vulnerable nga sakit bangud nga sanda ro prone sa sakit nga 2019 coronavirus disease ukon COVID-19 pandemic.
Samtang, ginlaygayan man kara ro mga pumueoyo nga inde eon magpasaway ag sundon eon lang ro ginapatuman nga sueondanan bilang pangaman kontra sa COVID-19 agud nga mapabiling eowas sa sakit nga COVID ro probinsya it Aklan.
Sa makaron suno kana hay sigidas ro pagdis-infect nga ginahimo it lokal nga gobyerno sa bilog nga banwa.
Nasayuran nga ro Western Visayas hay nakalista eon it ap-at nga kaso it mga nagpositibo sa COVID-19.
Sa nasambitang numero daywa kara ro sa Iloilo ag tig-sambilog sa syudad it Roxas ag Bacolod.
