KALIBO, Aklan — Sambilog ro patay samtang limang iba pa ro naninahan matapos nga sumunggab ro tricycle sa sangka multicab sa bahin it national highway sa Brgy. Naungon, Sebaste, Antique.
Patay ro tricycle driver nga si Ada Grace Magpusao, 33, samtang sa kritikal nga kondisyon ro angkas nga igmanghod nga si Michelle Magpusao, 27, parehong residente it Culasi, Antique nga gin padangat sa Aklan Provincial Hospital kaibahan ro ap-at nga naninahang sakay it nakasunggab nga multicab.
Nakaangkon man it grabeng nina sa ueo ro driver it multicab nga si Janus Andrade, 33, it Oyo Torong St.Kalibo, kamana man ro mga sakay kara nga sanday Jefferson Capispisan, 21; Jerson Capispisan, 32 ag Liane Taligatos, 42, parehong mga residente it Brgy. Tamalagon, Tangalan, Aklan ag Evangel Fuentes, 48, it C. Laserna St. Kalibo.
Suno kay PO3 Jimmy Gallego it Sebaste Municipal Police Station, pauli eon sa Aklan maghalin sa pagpamakae it baboy sa Antique ro mga sakay it multicab kat sumunggab ro kasubeang nga tricycle maghalin sa sangka kasadyahan.
Naga padayun ro imbestigasyon it kapulisan sa nasambitan nga insidente.
