Magapangatubang sa reklamong pag-eabag sa Republic Act 9165 ukon Comprehensive Dangerous Drugs Act of 2002 ro sangka 17-anyos nga binatilyo matapos nga madakpan nga may illegal nga droga ro anang gindaea nga tinuean-on para sa sangka person’s deprived of liberty ukon PDL sa Bureau of Jail and Management Penology ukon BJMP facility sa Brgy. Nalook, Kalibo.
Suno kay SJO4 Peter Maagma it BJMP Aklan, may ginatawag nga paabot system sa andang pasilidad apang antes makaabot ro mga goods ukon anuman nga ginatao sa PDL hay nagaagi raya sa maid-id nga inspection ag screening kon sa siin dikara nataeopangdan nga may kakaiba sa tangkong nga daea it binatilyo nga residente it Brgy. Bugasongan, Lezo.
Bangud kara, gin-impormahan imaw it anang team ag temporaryong ginpapundo ro operasyon sa pasilidad hasta sa ginhold nanda ro eaeaki.
Nagpatawag man sigon sanda it nagkaeain-eain nga awtoridad nga makawitness sa andang pagpadayon it pagsearch sa daea it binatilyo.
Angot kara, narekober ro ap-at nga shachet it suspected shabu ag sangka ring nga nakarolyong foil.
Ginsugo eamang sigon raya nga magdaea it tinuean-on ag karne it baboy sa sangka inmate sa sueod it pasildiad ag hugot man nana nga ginpamalibaran nga nagaduso imaw it illegal nga droga.
