KALIBO, Aklan–Arestado ro tatlong indibidwal sa ginpatigayon nga operasyon it Aklan Police Provincial Office–Provincial Intelligence Unit ukon Aklan PIU kontra sa ilegal nga tupada sa Barangay Aranas, Balete bandang alas-10:00 it agahon, adlaw it dominggo.
Ginkilaea ro mga naaresto nga sanday alyas “Tony,” “Bert,” ag “Andong,” nga puro mga residente it Balete.
Nadakpan sigon ro mga raya samtang nagapatigayon it ilegal nga tupada nga pag-eabag sa Presidential Decree No. 449 ukon Cockfighting Law of 1974.
Narekober sa operasyon ro ap-at nga buhi nga manok pambueang, daywang patay nga manok ukon bihag; 15 tari, tatlong bueotangan it tari ag maabong iba pa kamana man ₱3,908 nga ginadudahan nga taya sa illegal nga bueang.
Ro madinaeag-on nga operasyon it Aklan PIU sa pagpanguna ni PMAJ Jerome S. Manahan hay sa pakikipagbuligan it Balete Municipal Police Station.
