Daywang magmaeanghud nga ungang eaeaki nga naga-edad it siyam ag 10 ro namatay matapos maeumos sa sangka fishpond maeapit sa andang baeay samtang nagapanuea-on it tangkong para sa andang ilabas sa Bayambang, Pangasinan, ko Setyembre 16.
Base sa imbestigasyon it kapulisan, nagabueuligan ro magmaeanghud sa pagbo-oe it tangkong kat maagto sa madaeum nga portion it sapa ro siyam nga dag-on nga manghud. Ginhana sigon raya nga eowason it anang 10-anyos nga magueang, apang pareho sanda nga naeumos.
Insigida nga nagpangayo it bulig ro andang waeong dag-on nga igkampod nga kaibahan man nanda.
Nabo-oe ro mga unga halin sa fishpond ag gindaea sa Bayambang District Hospital, apang parehong gindeklarang dead on arrival.
Nagpaabot man it pakikisimpatiya ag bulig ro lokal nga gobyerno it Bayambang sa mga naaywan nga pamilya.
