10-anyos nga ongang babaye nga nag-uli it mabahoe nga balor it kwarta, gindayaw ag ginhangaan

KALIBO, AKLAN — Gindayaw ag ginhangaan ro napueong dag-on nga ongang babaye nga nag-uli it nakapilo nga kwarta nga nagabalor it P9,000 sa sangka mall sa Roxas Avenue Extension, Kalibo, Aklan.

Suno sa onga nga si Allen Ross Ramos, sangka estudyante ag residente it Barangay Linabuan Norte, Kalibo, samtang nagahampang sa mall kaibahan ro anang ingkampod ag manghod hay napueot nana sa pungkuan ro kwarta nga nahueog halin sa boesa it sangka eaeaki.

Insigida sigon nana raya nga gindaea sa sangka cashier it mall.

Ginpahayag dugang it onga nga gin-uli nana ro kwarta bangud sa pangaral kana it anang mga ginikanan nga “inde pag-interesan ro mga bagay nga bukon it anda.”