Nagabuylog ro Cooperative Alliance for Modernized Transport Business Industry Operation sa iba pang grupo kaparehas it Pagkakaisa ng mga Samahan ng Tsuper at Operator Nationwide (PISTON) ag Manibela sa panawagan nga kinahang-ean eon nga ibasura ro Oil Deregulation Law agud nga inde eubusan nga maparalisa ro sektor it transportasyon sa nasyon.
Suno kay Louie Tabios, presidente it nasambit nga grupo, dapat kato pa man hay ginbasura eon ro nasambit nga laye bangud nga ro ginaprotektahan eamang kara hay ro mga maeagkuang negosyante it langis.
Aminado imaw nga mabahoe ro ginakita it gobyerno bangud sa fuel excise tax apang sanda ro eubus nga pinakaapektado it ginapangatubang makaron nga krisis nga ginakabig pa man sanda nga backbone economy it nasyon.
Raya hay matapos nga ginalamas ag gina-corrupt manlang it mga gahamang opisyales it gobyerno ro pondo it kaban it bayan nga dapat kunta hay ginabalik raya sa publiko pinaagi sa maayos nga serbisyo maghalin sa transportasyon, ikamayad nga eawas ag maabong iba pa.
Nagakasugot suno kana ro nagkaeain-eain nga grupo it transportasyon pag-abot sa panawagan nga isuspinde eon ro fuel excise tax ag mas manami kon mabasura pa gid ro Oil Deregulation Law.
