KALIBO, Aklan—Napas-eawan ro 10 nga building owners sa Boracay nga mapapundo ro pagtibag sa andang mga istraktura nga gin-umpisahan nga i-demolish ko nagtaliwan nga domingo matapos nga owa nagpaguwa ro korte it order for injunction nga ginapangayo nanda.
Bangud kara, nagapadayun ro demolisyon sa iba pang mga hotel ag commercial establishments nga nag-eabag sa easement law sa Bulabog Beach.
Sa ginpatigayon nga pagpamati it korte, owa nagpasugot ro Boracay Inter-Agency Task Force sa pagpanguna ni Boracay Inter-Agency Rehabilitation Management Group (BIARMG) general manager Natividad Berdandino sa apelang gentleman’s agreement ni Atty. Salvador Paolo Panelo Jr. nga ipapundo anay ro demolisyon sa sueod it limang adlaw samtang ginapamatian ro hinyu nga writ of preliminary injunction.
Apang nagpanindugan si Berdandino nga kinahang-ean nga maging patas sa pagpatuman it anumang laye sa isla.
Suno kana sa 52 nga natumod nga non-compliant sa Bulabog area, ro 10 establishment owners eon lang ro owa nagasunod sa mandu nga magpatigayon it self-demolition maskin nga ro parte it andang istraktura hay nakasueod sa 30-meter easement.
Nasayuran nga ko Huwebes hay gin-umpisahan ro pagtibag sa 10 istraktura, kun sa siin, sangkiri pa nga nakaangkon it tensyon matapos nga mapaso ro 20 diyas nga temporary restraining order (TRO) nga ginpaguwa it Aklan Regional Trial Court Branch 7.
