Nagsaka eon sa 10 katawo ro namatay nga puro mga Syrian national sa ginlunsar nga airstrike it Israel sa sangka residential building sa Nabatieh city sa southern Lebanon.
Suno sa Lebanese health ministry, kaibahan sa mga namatay hay sangka babaye kaeakip ro anang daywang ka mga onga samtang lima nga iba pa ro naninahan ag daywa ro una sa kritikal nga kondisyon.
Suno mat-a sa Israeli military, ginkumpirma nandang tinamaan it andang air force ro weapons storage facility it Hezbollah sa sueod it sang gabie sa may Nabatieh, 12 kilometers halin sa Israeli border.
Madumduman nga naglala pa ro tensiyon sa rehiyon sa mga nakataliwan nga inadlaw matapos ro mapanghalit nga rocket strike sa okupado it Israel nga Golan Heights nga ginabasoe sa Lebanese militant group nga Hezbollah.
Ginbaeosan man raya it Israel it strike nga ginkamatay it top Hezbollah commander nga si Fuad Shukr sa Beirut.
Nagpromisa mat-a ro Hezbollah nga ibaeos nanda ro pagkamatay it andang lider kamana man ro andang kaalyadong Iran hay nagpamaeag man nga magbaeos bangud sa pagkamatay it Hamas political leader nga si Ismail Haniyeh sa anda mismong teritoryo sa Tehran.
