Nagapanawagan ro sangka Provincial Board member nga taw-an it insigidang aksyon ro gina-alegar nga ilegal nga pagkansela sa Certificate of Land Ownership Award ukon CLOA it mga katutubong Ati sa Isla it Boracay.
Raya hay kasunod it ginkasang hubeag protesta it mga miyembro it Asosasyon it Boracay Ati Tribal Organization ukon ABATO sa guwa it taeatapan it Department of Agrarian Reform ukon DAR provincial office sa banwa it Kalibo.
Suno kay Board member Apolinar Cleope, andang iga-rekomendar nga dapat nga maibalik sa mga katutubo ro andang kinamatarung sa eugta nga gintau kanda it gobyerno.
Ro mga Ati sa Boracay hay gintaw-an it kapin sa 800 square meters nga eugta nga may limang CLOA nga makit-an sa magkaseparadong lugar sa Barangay Manoc-Manoc nga puro may claimant.
Daywa eon sa mga raya hay nasueod ag ginbarikadahan it mga blue guards it sangka private land developer nga naga-angkon sa nasambit nga mga property nga ro andang ginabuytan eamang hay tax declaration.
Pinaka-ulihi kara hay ro pag-okupa sa sambilog sa pa nandang eugta nga basta eon lang nga ginbawi kanda.
Nakabaton ro mga raya it notice to vacate ko Enero 24, 2026 rason nga nagdihon it mosyon ro andang abogado ko Pebrero 4.
Apang nakibot sanda kat ginbawaean nga makasueod sa lugar ko Pebrero 16.
Nasayuran nga gintau it DAR ro mga CLOA sa mga miyembro it Ati community ko 2018 agud nga makaangkon sanda it kaugalingon nga eugta nga matamnan ag maistaran.
Raya hay kaparte kato it prayoridad ni Pangueong Rodrigo Duterte sa pagpaidaeum sa Boracay sa rehabilitatasyon.
Ginbawi ro mga CLOA it administrasyong Marcos sa sangka mandu ko Enero 29, 2024, matapos matukiban sa pag-usisa nga bukon it ideal ro eugta nga umhan ukon tamnan.
Pirmado raya ni DAR Secretary Conrado Estrella III ag ginmandu ro pagpahalin sa mga katutubong Ati ag ginpaboran ro reklamong ginpasaka it mga private land developer.
Sa makaron hay owa pa it ginpaguwa nga pahayag ro DAR-Aklan angot sa nasambit nga isyu.
