KALIBO, Aklan — Patay ro sangka 11-anyos nga unga nga babaye matapos tamaan it dengue sa Brgy. Caticlan, Malay.
Ginasugid nga nagsakit ro ueo ag gina-eagnat ro unga nga si Tressha Mae Torres, residente it nasambit nga lugar antes imaw nga daehon sa Aklan Provincial Hospital.
Nauna kara, gindaea anay sa Motag Hospital sa Malay ro biktima apang ko ulihi hay ginsaylo sa provincial hospital kon siin imaw ginbawian it hueam nga kinabuhi bandang alas-2:00, Martes it hapon.
Nasayuran nga base sa pinakaulihing datos it Aklan Provincial Epidemiology Surveillance and Response Unit it Provincial Health Office (PHO) nagaabot eon sa 4,980 ro mga nailistang nagkasakit it dengue sa probinsya it Aklan halin ko Enero 1 hasta it Agosto 31, 2019, ag pang-21 eon sa mga namatay ro biktima.
Sa nasambit nga datos, kapin sa 337 porsyento ro gintaas kara kon ikumpara ko dag-on 2018.
Nagapanguna gihapon sa listahan ro banwa it Kalibo nga may 981 kaso; ginasundan it Banga nga nakalista it 452 kaso; nagapangatlo ro New Washington nga may 444 kaso; nag pang ap-at ro Balete nga nakalista it 367 kaso ag Numancia nga may 352 kaso.
Samtang, mag-eowas sa nasambit nga sakit, ginatutukan eon man it PHO ro iba pang mga sakit kaparehas it measles-rubella ag influenza.
