Ginpaabot it tagapaghambae it Senate impeachment court nga 11 nga boto, kaibagan ro boto it presiding officer, ro kinahangean agud nga mabalewala ro naunang desisyon nga nagtaeana it 16 nga boto bilang kinahangean para masentensiyahan sa impeachment trial si Vice President Sara Duterte.
Suno kay court spokesperson Reginald Tongol, 20 eamang ro aktibong senator-judges bangud nga owa nakatambong ro ap-at nga senador—sanday Ronald “Bato” dela Rosa, Jinggoy Estrada, Rodante Marcoleta ag Loren Legarda. Bangud kara, 11 nga boto ro katumbas it majority.
Ginklaru man ni Tongol nga magaboto si Senate President ag impeachment court presiding officer Francis “Chiz” Escudero sa isyu. Gin-imbitahan ro ap-at nga retiradong mahistrado it Supreme Court agud nga magtau it andang legal nga panan-awan sa probisyon it Konstitusyon angot sa two-thirds vote nga kinahangean para sa conviction sa impeachment trial.
