Gindakop pinaagi sa “citizen’s arrest” it sangka 19 anyos nga eaeaki ro 15 anyos nga binatilyo matapos nga mataeupangdan ro anang bitbit nga baril sa Crossing Buswang, kainang aga-aga adlaw it Lunes Oktubre 9.
Pag-eabag sa comelec gun ban ro ginapangatubang it menor de edad nga residente it Brgy. Andagao,Kalibo sa paghupot it sangka 9mm nga baril nga kargado it mga bala.
Suno sa panugiron ni Alyas John residente it Brgy. Andagao nga pagkakita nanda nga gin’alsa ag ginpakita it binatilyo ro daea nga baril hay insigida nanda raya nga gintinguhaan nga maaresto ag maagaw ro armas.
Ginhana sigon it andang grupo nga bue-on sa suspek ro baril nga suno kana hay ginapasikat it hilong nga suspek.
Pahayag pa ni Alyas John nga concern eang sigon imaw bangud nga medyo may plano ro menor de edad nga magpang-abang it mga tawo.
Uwa man sigon nagsukoe ro menor de edad kat ginhana nga bue-on kana ro baril ag ginturn over sa Kalibo Municipal Police Station.
Presente pa nga naimbestigahan kung paano nag-angkon ro binatilyo it baril.
Matandaan nga padayon gihapon ro pagpatuman it COMELEC gun ban para sa mas matawhay nga naghalipat nga eleksyon sa Oktubre 30.
