Tatlong baeay ro naugdaw sa nagtuhaw nga sunog sa Sitio Airport, Bgy. Caticlan, Malay bandang alas-7 it gabi-i it Lunes, Abril 6.
Suno kay FO1 Noel Natividad Jr., Fire Arson Investigator it Bureau of Fire Protection (BFP)-Malay, ro mga biktima hay puro naga-renta eamang sa naabo nga mga baeay nga kaeabanan hay himo sa concrete ag light materials.
Ginpahayag dugang nga padayun pa ro andang ginahimo nga imbestigasyon sa rason it sunog.
Kaibahan sa andang ginatan-aw nga anggulo hay ro naging panaysayon it sambilog sa mga occupant nga posibleng bangud sa napabay-an nga baga sa andang kusina ro rason it sunog.
Owa man it gin-report nga naninahan sa insidente, apang ginaboeobanta nga naga-abot sa P17,500 ro kahalitan sa propiyedad.
Eubusan nga natapna ro sunog bandang alas-8:39 it gabi-i.
Samtang, ginpadudum ni FO1 Natividad ro publiko nga padayun nga magsunod sa mga safety measure, eabi eon makaron nga mas naga-init ro paniempo kadungan sa pagsueod it dry season.
