KALIBO, Aklan—Inde pwedeng basta eon lang nga ipanaba it impeachment court ro kinahang-eanong boto para sa conviction bangud sa nakapirmi sa konstitusyon ro two-thirds majority requirement.
Sa baylo, ro kinahang-ean klaruhon hay kon paano dapat ipakahueogan ro kataga nga “of all members” sa isyu it kinahang-eanong boto.
Suno kay constitutional lawyer Atty. Michael Henry Yusingco, dapat kunta hay nasolbar eon ro nasambit nga isyu sa unang adlaw pa eamang it impeachment proceedings.
Apang, matapos ro masobra sa 20 diyas it pagpamati, dikato pa eamang gintalakay nga posibleng maging indikasyon nga nalisdan ro mga senador nga maangkon ro kinahang-eanong 16 nga boto para sa conviction.
Ro paathag ni Atty. Yusingco hay kasunod it pahayag sa senate impeachment court nga kinahang-ean it 11 boto halin sa mga senator-judge agud ma-overturn ukon mabag-o ro nagairal nga 16-vote threshold para masentensyahan si Vice President Sara Duterte sa impeachment case.
Nasayuran nga pagatalakayon it uman it impeachment court ro voting threshold sa Setyembre 16, bago ihathat it prosecution ag defense ro andang mga argumento sa Setyembre 23.
Nauna eon nga nagtaeana ro Senate impeachment court it tatlong dating Supreme Court chief justice ag sangka retiradong associate justice bilang amici curiae ukon mga “kaibigan ng hukuman” agud magbulig sa pagtao it legal nga panan-awan sa isyu it voting threshold.
