KALIBO, Aklan — Kapin sa 18 nga menor de edad ro gin himos it mga otoridad sa magkaeain-eain nga lugar sa isla it Boracay matapos nga mag eabag sa ordinansa it curfew.
Gin suyod it mga tawuhan it Boracay Tourist Assistance Center kaibahan ro iba pang naga kaigong ahensiya it gobyerno ro bug-os nga isla agud himuon ro disciplinary hour sa mga menor de edad.
Kaabuan sa mga raya hay naispatan sa front beach, computer shops, bilyaran ag iba pang tambayan it mga kabataan.
Suno kay BTAC acting chief PSI Jose Mark Anthony Gesulga, gina himo nanda ro disciplinary hour agud makalikaw ro mga pamatan-un sa mga krimen kada gabie.
Gina patuman ro curfew sa nasambitang isla maghalin alas-10:00 it gabie hasta alas-5:00 it agahon.
Samtang, ro mga nag eabag sa unang kahigayunan hay gin paidaeum sa seminar it tunga sa adlaw it Municipal Social Welfare and Development Office (MSWDO) kaibahan ro mga ginikanan.
Apang, sa ikaywa ag ikatatlong kahigayunan nga uman nga madakpan hay maga pangatubang eon sa pagbayad it multa ag posibling makulong ro mga ginikanan.
