KALIBO, Aklan—Ginkalipay it lokal nga gobyerno it Malay ro pag-abot it dugang nga 18,200 doses COVID-19 vaccines nga himo it Sinovac halin sa Department of Health (DOH).
Ro nasambit nga shipment it bakuna hay nag-abot sa Kalibo International Airport pasado alas-11 kahapon, Agosto 6 sakay it Philippine Airlines halin sa Metro Manila.
Suno kay Malay Mayor Frolibar Bautista nga 3,200 doses ro gin-alokar para sa Municipal Health Office (MHO)-Malay samtang ro 15,000 doses it bakuna hay iga-alokar man sa Provincial Health Office (PHO).
Mabahoe ro naging pagpasaeamat it alkalde sa dugang nga supply it bakuna eabi eon ag padayun ro pagtaas it numero it mga tinamaan it Coronavirus Disease 2019 ukon COVID-19 sa Aklan.
Aminado si Bautista nga mabahoe ro epekto it ginapatuman nga paghugut sa probinsya kamana man ro pagpatuman it Enhanced Community Quarantine (ECQ) sa National Capital Region (NCR) eabi pa ag kaabuan sa mga turistang nagabisita sa Boracay hay maghalin idtu.
Sa makaron, owa anay nagabaton it mga bisita ro isla kasunod it pagpaidaeom sa Aklan sa Modified Enhanced Community Quarantine (MECQ) hasta Agosto 15.
