Hugut nga ginpamalibaran it 1st Aklan Mobile Force Company it Aklan Police Provincial Office ukon APPO nga “planted” ro sangka baril nga narekober sa ginpatigayon nga pag-serbi it Search Warrant sa baeay it sangka tanod sa Barangay Tabangka, Numancia, agahon it Biyernes, Pebrero 20, 2026.
Suno kay P/Major Ronald Cesar, deputy it 1st Aklan Mobile Force Company nga ro mga narekober nga loose firearms hay resulta it sangka lehitimong operasyon kontra sa andang target nga si alyas “Julimar”, 43-anyos, tanod sa Brgy. Bugasongan, Lezo apang residente it nasambit nga lugar.
Ginpahayag dugang nga bukon raya it himo-himo ukon gintanum bangud nga may nagakaigo sanda nga ebidensiya agud nga pamalibaran ro nasambit nga akusasyon it suspek.
Mag-eowas sa mga testigo nga katapo it media ag barangay officials, may nagakaigo sigon sanda nga body worn cameras ag photographer para sa transparency it operasyon.
Ginkasa sigon ro operasyon matapos nga ma-verify nga bukon it holder it licensed firearms ro tanod.
Nauna kara, may naga-eksister man nga police blotter ro suspek sa sangka police station angot sa gina alegar nga pagpinaeupok kara it baril.
Sa maid-id nga paghaeughog it mga kapulisan sa baeay it suspek, narekober ro tatlong nagkaeain-eain nga klase it armas ag bala kaibahan kara ro sangka rifle, sangka kalibre .22, eakip ro mga bala kamana man ro sangka kalibre .38 nga kargado it mga bala.
Apang gin-insister it suspek nga ro narekober nga kalibre .38 nga baril nga nakita sa sueod it bueutangan it mga eambong hay owa nana ginapanag-iyahan ag nagpanindugan nga raya hay “planted.”
Samtang, gin-insister pa ni Major Cesar nga ro nasambit nga kadaeag-an hay nagapakita it andang determinasyon nga suk-ean ro ilegal nga pagtago ag pagpanag-iya it armas nga owa it nagakaigo nga dokumento.
Gin-engganyo man nana ro mga gun holder nga owa it dokumento nga isurender kanda agud nga makalikaw sa kaso.
Nagapadayun man sigon ro andang reward system nga “Armas Baylo Bugas” ukon Guns for Rice program nga nagatuyo nga mabawasan ro mga loose firearms.
Ro operasyon hay pinaagi sa pagbueuligan it gintingub nga pwersa it Provincial Intelligence Unit it Aklan Police Provincial Office ukon APPO, kaibahan ro Numancia Municipal Police Station.
